MKWASA: NAKUJA YANGA, TWITE ANENA

 

Kocha Mkuu wa Ruvu Shooting,Charles Boniface Mkwasa.PICHA|MAKTABA 

KOCHA Mkuu wa Ruvu Shooting, Charles Boniface Mkwasa, ameweka wazi kwamba yupo katika mazungumzo na viongozi wa Yanga na yakikamilika atatua Jangwani kuchukua nafasi ya Kocha Msaidizi, lakini kiraka Mbuyu Twite ametoa masharti ya mkataba mpya.

Mkwasa ambaye aliwahi kuitumikia Yanga miaka ya nyuma akiwa mchezaji na hata kocha mkuu, amesema alifuatwa na mabosi wa klabu hiyo ambao tayari mazungumzo yao yamefikia sehemu nzuri, lakini akagoma kuweka bayana alichozungumza nao.

Ujio wa Mkwasa umekuja baada ya Yanga kumpa notisi ya siku 30 Kocha Mkuu, Ernest Brandts, huku fagio kubwa likitarajiwa kupita kwenye vichwa vilivyosalia katika benchi la ufundi alipo Kocha Msaidizi, Fred Minziro.

Mkwasa amesema mabosi hao wa Yanga katika mazungumzo aliyofanya nao, wameonyesha nia ya kumrudisha kuwa kocha msaidizi ambapo kocha mkuu atakayechukua nafasi ya Brandts bado hajajulikana.

“Nikweli nimefanya mazungumzo na viongozi wa Yanga, wanaonyesha wanataka kunipa nafasi ya kocha msaidizi, mazungumzo bado yanaendelea hatujafikia mwisho katika kujua nini tumekubaliana,” alisema Mkwasa.

“Mimi nipo tayari kurudi Yanga, lakini kwa sasa siwezi kukuhakikishia kuwa nimepewa nafasi hiyo, ningekuomba usubiri viongozi wa klabu ndiyo watakupa jibu la moja kwa moja, hakuna haja ya kuwa na haraka katika hilo.”

Endapo Mkwasa atapewa nafasi hiyo, ni wazi kuwa itakuwa ni kwaheri kwa Minziro ambaye kila mara Yanga inapokuwa kwenye matatizo huitwa kuokoa jahazi kwa vile ni mwanachama na mchezaji wa zamani wa timu hiyo.

Katika hatua nyingine, wakati wachezaji muhimu wa Yanga wakiongeza mikataba yao klabuni hapo, beki kiraka, Mbuyu Twite, amegoma kusaini mkataba mpya akitoa sharti kwamba asubiriwe mpaka msimu umalizike.

Kwa mujibu wa kanuni za soka za kimataifa, beki huyo yupo huru kufanya mazungumzo na klabu yoyote kwa ajili ya kuichezea kutokana na mkataba wake kubakisha miezi mitano.

Akizungumza na Mwanaspoti, Twite alisema: “Najua kama mkataba wangu unamalizika mwishoni mwa msimu huu wa ligi, wapo baadhi ya wachezaji wameongeza mikataba mingine mipya, lakini kwangu bado kwanza nasubiria ligi imalizike ndiyo nisaini mkataba mwingine mpya kama tutaafikiana kwa vile mimi naangalia fedha.

“Nimeanza kufanya mazungumzo na viongozi kwa ajili ya kusaini, nimewaambia wasubiri kwanza ligi imalizike ndiyo niaamue. Ninajua zipo timu zitanifuata kwa ajili ya kunisajili, lakini kwanza nitaipa nafasi timu yangu ya Yanga kwa kuangalia ofa yao watakayonipa kabla ya sijachukua uamuzi mwingine.”

Kocha aliyeondoka Azam, Stewart Hall, alikuwa amepanga kumsajili beki huyo baada ya mkataba wake kumalizika na Yanga. Habari za ndani zinadai kwamba beki huyo anasusa kusajili kwa vile lolote linaweza kutokea na akapata dau kubwa kutoka kwa mahasimu wa Yanga.